• Novos obradoiros

    Remataremos a presente quenda semestral retomando as actividades formativas dos Locais de Ensaio con dous novos obradoiros.

  • Aberto novo prazo de inscrición

    Ábrese un novo prazo de inscrición para optar a unha das 48 prazas de ensaios dispoñibeis para os vindeiros 6 meses.

  • Festival Solidario Coruña En Directo XI

    Podes recoller as invitacións no Centro Municipal de Información Xuvenil do Fórum Metropolitano, nos propios Locais, ou no acceso ao auditorio do Centro Ágora o día dos concertos, a partires da apertura de portas (18.30 h).

  • Volume 6

    Volume 6 é unha intensa mirada ao traballo realizado no noso estudio de gravación durante o 2016, logo de meses previos de ensaios.

30 de out. de 2014

Obradoiro Silencio, Gravando (parte 1): Antes de entrar en estudio


Velaquí tedes a nosa proposta formativa do mes de novembro, un obradoiro para que decidades as mellores opcións no momento no que o voso grupo ten uns temas compostos e queredes gravalos, e como non perder tempo (ou diñeiro según o miredes) durante o proceso.

Falarase de:

- Cando gravar cun Home Studio, e cando nun estudio profesional.
- Como ensaiar coas maiores garantías, o uso de aillantes e defusores (mesmo como facelos ti), e como dispoñer o backline para que escoitedes mellor como soades como grupo.
- Preprodución musical: Creación de arranxos, definición de tempo, estructuras, ensaios, definir o son do grupo, execución individual, control da dinámica, e ensaios con metrónomo.
- Posta a punto do backline:
+ Baterías: Parches, baquetas, pratos, evitar ruidos do hardware, resonancias, ...
+ Guitarras, baixos e teclados: elección e cambio de cordas, afinación, coidados do cableado, uso de pedais, mantemento de potenciómetros, ...

Este obradoiro é o primeiro parte dunha serie de 2. O seguinte, tratará propiamente o momento da gravación.

O poñente elexido para este evento é Jose Puga, experimentado produtor e técnico de son que ten traballado con artistas tan diversos como Obús, Barón Rojo, Carlos Núñez, Donal Lunny, Rosa Cedrón, Mercedes Peón, B.B. King, Paquito de Rivera, Billy Hoffman, ... Ademais de fundador da empresa Mare, que conta con estudio de gravación, selo discográfico, axencia de management e produción integral de espectáculos. Forma parte da directiva de MMF Spain (Music Managers Forum), e ten organizado cursos e master classes con enxeñeiros e produtores internacionais como Bob Katz, Tony Platt, Phill Brown ou Gil Norton.

Desta vez, o obradoiro será no Centro Ágora, o venres 7 ás 19.00 h. Para asistir, deberás seguir os pasos que atoparás aquí, e mandarnos a túa solicitude antes do xoves 6 ás 21.00 h.
Share:

9 de out. de 2014

Obradoiro de xestión de redes sociais



Comezamos o semestre, e con él a acción formativa dos Locais. Desta vez será un obradoiro de xestión de redes sociais (ou como facer de Community Manager do xeito máis eficiente co teu grupo). Facilitamosvos os puntos que se tratarán nel:

Temario:
1.- Introducción ás redes sociais: novos contextos comunicativos
2.- A quen nos estamos a dirixir?: público obxectivo e potencial
3.- Deseño da estratexia, creación de contidos e xestión de comunidades
4.- Do local ao universal
5.- Ferramentas e aplicacións: programación e monitorización
6.- Conclusión: crise Vs oportunidade

Analise:
a) Estratexia de comunicación do Resurrection Fest
b) Casos de éxito/fracaso de artistas/bandas locais, estatais e internacionais

Caso práctico:
Opción 1: Creación dunha Fan Page
Opción 2: Analise de imaxe e xestión dunha Fan Page

(Recomendase acudir cun ordenador portátil, ou ben un dispositivo móbil)

A poñente deste evento será Alba Porral. Periodista especializada  en produción e xestión audiovisual, traballa actualmente como redactora web para laopinioncoruna.es, mais xa tivo experiencia no mundo musical, ao formar parte do departamento de prensa do Resurrection Fest desde a súa primeira edición (festival que nos seus 9 anos de vida ten logrado posicionarse entre os principais festivais de música alternativa grazas á labor dun gran equipo de profesionais que traballa durante todo o anopara superarse en cada edición). Alba tamén ten colaborado con outros proxectos musicais como coa Vargas Blues Band, Twenty Fighters ou Holywaters.

O obradoiro terá lugar o sábado 18, ás 17.00 h, no Espazo de Iniciativas Xuvenís (rúa Matadoiro, 68). Para acceder, deberás seguir os pasos que atoparás aquí e mandar a solicitude antes do día 17 ás 21.00 h., momento a partires do que confirmaremos a asistencia.
Share:

2 de out. de 2014

Horarios outubro 2014/marzo 2015

Con data de 1 de outubro de 2014, tras o proceso de valoración de solicitudes recibidas para a quenda de outubro 2014/marzo 2015, aprobase a listaxe definitiva que se publica neste blogue. Tras a aprobación da listaxe definitiva procédese á selección e adxudicación de horarios aos grupos, seguindo os criterios establecidos no regulamento.


Share:

27 de set. de 2014

Crónica #EnDirectoVI


Onte desfrutamos dunha nova edición do noso festival solidario. Agardamos á pesaxe oficial da Cociña Económica para comunicárvola, pero agradecemos a gran cantidade de doazóns recibidas polas 360 persoas que se achegaron á Sala O Túnel.

Senectud Sideral encargaronse de soltar os primeiros acordes, sorprendendo aos que coñecían as versións de estudio dos seus temas con xiros máis progresivos.

Say My Name presentaban baixista, e vaia se o notamos. Non perdas comba, moita xente xa lles segue
(foto cortesía de Basti Soto)

Us In The Mirror debutaban no festival sentando as bases do seu son

Notase cando un grupo o pasa ben tocando, e Breathing Loud onte o pasaron xenial

Man City Blue seguen a crecer coma grupo

Tanit, no seu primeiro concerto como banda. Pero ollo, que van como un tiro e o 2º xa o teñen na Mardigras este xoves, dentro do I Circuito Coruña Sonora

Hooked (con baixista suplente por mor dunha lesión a unha semana vista do concerto) viaxaron polo lado máis punk do Rock Alternativo

A actitude Rock de Beards & Beers levou das ovacións máis grandes da noite

Non pode haber un festival En Directo sen After All. É así!. De feito, non fallaron nin unha edición!!

Presentaran nova vocalista a noite anterior, e subiron ao escenario co ritmo no corpo. The Ice Road

A The Aerial Root lles desexamos o mellor, xa que os seus integrantes levan con nós desde case o comezo, en bandas que ben coñecen este festival como Black Babylon, Carretera Comarcal, Dharmak ou The Zipper

A posta en escea de Hateout é como esta foto: Movida e con fogonazos. Gran colofón Metal ao festival
Share:

24 de set. de 2014

Listaxe provisional de admitidos para a quenda Outubro 2014- Marzo 2015

A continuación se publican as listaxes provisionais na solicitude de prazas para a quenda semestral que comezará o 1 de outubro.


Unha vez publicada a listaxe provisional, ábrese un prazo de 5 días hábiles, desde a publicación, para que os interesados podan presentar as alegacións que estimen convintes. Finalizado este prazo, publicarase a listaxe definitiva. Os grupos que constan con solicitudes incompretas poderán achegar a documentación requerida no horario de apertura dos Locais, poñendo como prazo límite o luns 29 ás 20.00 h. Os grupos excluidos poden porse en contacto cos Locais de Ensaio da Concellaría de Educación, Deportes e Xuventude no e-mail: locaisdensaio@gmail.com

Todos os grupos que finalmente resulten aptos estarán convocados á xuntanza de adxudación de horarios que terá lugar na Sala O Túnel do Coliséum o martes 30 ás 19.00 h. Nela, como é costume, iranse repartindo os 39 horarios de ensaio dispoñibeis segundo a orde estipulada no noso regulamento interno, e para decidir os horarios precisaremos un representante de cada un dos grupos (no caso de non contestar un grupo, este irá por orde para a listaxe de agarda).

Moitas sorte a tod@s!!.
Share:

22 de set. de 2014

VI Festival Solidario En Directo + Lanzamento do Volume 4


Temos o gusto de presentar a sexta edición do Festival Solidario En Directo, formando o cartaz 12 grupos usuarios dos Locais de Ensaio. Os que se acheguen á Sala O Túnel o venres descubrirán as novas propostas da canteira musical da cidade, divididas en catro estilos:

- 19.00 h. Pop: Senectud Sideral, Say My Name e Us In The Mirror
- 20.30 h. Rock Alternativo: Breathing Loud, Man City Blue, Tanit e Hooked 
- 22.30 h. Rock: Beards & Beers, After All, The Aerial Root e The Ice Road
- 00.30 h. Metal: Hateout

O evento terá unha duración de 6 horas, e comezará puntualmente ás 19.00 h (apertura de portas 18.30 h.). Para acceder, deberedes adquirir unha invitación no Centro Municipal de Información Xuvenil do Fórum Metropolitano, nos propios Locais de Ensaio e, de non esgotarse previamente, no acceso á Sala O Túnel o día do concerto. Ademais, habilitarase un espazo na recepción para recibir as doazóns de 3 Kg de comida non perecedeira do público, que irán a favor da Cociña Económica.

O obxectivo deste evento é, por un lado, mostrar o traballo realizado polos 12 grupos participantes nos últimos meses e, polo outro, superar os 1350 Kg de alimentos obtidos na anterior edición (aínda que achegarse a esa cifra xa sería un éxito).



Ademais, sae á luz o 4º recopilatorio de temas gravados no estudio de gravación dos Locais de Ensaio, cunha tirada de 1500 copias que se poderán obter (de balde) na rede de Bibliotecas Municipais, no CMIX e nos Locais de Ensaio. Son 15 temas de distintos estilos musicais, e onde atoparemos tanto grupos que plasmaban por primeira vez unha composición propia (Back Away, Beards & Beers, Breathing Loud, Lenny Leonard, Moonk, Scream For A Nightmare), participantes do Circuito Coruña Sonora (Man City Blue, Senectud Sideral, Tanit, The Ice Road, ) ou vellos coñecidos doutras edicións como Black Babylon, Tremebundos ou SeisPorOito, e mesmo formacións que levan aparecendo desde a primeira edición (Almakoa e Avézar).


Share:

8 de set. de 2014

Novo periodo de inscrición para a quenda semestral outubro 2014 - marzo 2015


Comeza o curso, comeza unha nova etapa. Como cada 6 meses, refaremos o cadrante de horarios de ensaio, dando a oportunidade a novos grupos que queiran achegarse ás nosas instalacións 3 horas á semana. O traballo deses grupos poderá verse reflectido tanto nos festivais que semestralmente producimos, con caracter solidario (polo xeral na Sala O Túnel do Coliséum, ou no Auditorio do Centro Ágora), e na edición anual do CD recopilatorio con temas dos grupos que pasaron polo noso estudio de gravación, así como tentamos dar nocións de auto-produción para xestionar os vosos proxectos musicais.

Para iso, deberedes presentar:
- Solicitude debidamente cuberta (importante non deixar nengún campo sen cubrir, para poder contactar con vós)
- Fotocopia dos DNI´s de todos/as os/as integrantes do grupo
- Certificado de empadroamento no Concello da Coruña, con data de 2014, ou ben matrícula nun centro educativo da cidade para o curso 2014-15 de, alo menos, o 50% dos/as integrantes do grupo
- Permiso paterno/materno/ do titor de todos/as os/as menores de 18 anos, asinado e acompañado pola fotocopia do DNI da persoa que da o permiso

Os arquivos de solicitude e permiso a menores podes atopalos neste mesmo blogue.

A data límite para recibir as inscrición é o sábado 20 de setembro, ás 14.00 h (os grupos que entreguen a solicitude desde o luns 22 en diante, entrarán directamente na listaxe de agarda, facilitándolles os horarios valeiros, en caso de telos, por orde de entrega).

Os únicos grupos exentos de presentar solicitude son os que actualmente constan na listaxe de agarda, ao presentar a solicitude para ensaiar na quenda que este mes remata e non atopar opcións de ensaio válidas para o grupo.

O lugar de recepción de solicitudes é a oficina do CMIX, no Fórum Metropolitano (r/ Río Monelos, 1).
Horario: Luns a Venres de 10.00 a 14.00 h e de 17.00 a 20.00 h, e o sábado 20 de 11.00 a 14.00 h.

A nova quenda dará comezo o 1 de outubro. O luns 22 de setembro emitirase unha listaxe provisional de admitidos, convocando a eses grupos ao evento de asignación de horario.
Share:

2 de xuño de 2014

Obradoiro sobre como conseguir concertos (crónica)


O sábado, moitos dos/as asistentes ao obradoiro marcharon cun novo enfoque que darlle ao seu proxecto musical. Tomi Legido case non parou de falar durante 2 horas e media sobre as pedras nas que case que todos os grupos tropezan, e como intentar esquivalas, e abofé que se tomou nota diso!.

A importancia da toma de decisións da banda, ou a xestión de temas económicos, sociais e publicitarios coparon gran parte do tempo, ademais de presentar ferramentas moi útiles para o traballo cooperativo entre os membros (trello), ou o doado que é facer un rider técnico en musicotec.


Share:

12 de maio de 2014

Como conseguir concertos?



Que é o máis importante nunha banda?
Como nos relacionamos co noso público?
Como nos relacionamos co "mercado musical"? (selos, prensa, salas de concertos, festivais, ...)
Temos poucos cartos... En que os gastamos?
Queremos que nos tomen en serio? Que erros non podemos comenter?

Estas preguntas, e todas as vosas dúbidas, ademais da presentación dunha ferramenta informática de traballo cooperativo para a xestión dun grupo de música e as persoas que colaboran con él as respostará Tomi Legido, entre outras cousas responsábel da programación musical da Sala Mardigras, ademais de socio na produtora 10d10.

O obradoiro será o sábado 31 ás 11.00 h, na Sala O Túnel, e coma sempre será de balde. Para asistir, deberedes seguir os pasos que aparecen aquí, antes do venres 30 ás 21.00 h.
Share:

28 de abr. de 2014

#AnimaciónCoruña42Locais


A mañá do domingo foi fría, pero iso non fixo que a xente quedara na casa. Preto de 3000 persoas correron nas carreiras polo circuito urbano, e había moita xente nas rúas para animalos. Entre eles, 12 grupos musicais (6 deles usuarios dos Locais de Ensaio da Concellaría de Educación, Deportes e Xuventude) que lle deron unha cor distinta á carreira, e chamaron á atención dos que por aló pasaban.

Beards & Beers fixeron espertar á cidade co seu Rock

Man City Blue non faltou á súa cita (actuaron en todas as edicións)

Reckless repartindo Metal

Hooked deixaron moi boa impresión

Blueside conectar co público

Say My Name demostraron o por qué de que a xente comece a falar tanto deles

Agradecemos a todos os grupos que quixeron participar, e damos a noraboa aos gañadores, e en xeral a todos/as os/as que acabaron as carreiras. Pero isto non remata, xa que durante toda esta semana levarase a cabo o concurso por ver cal das animacións foi a mellor. Tedes toda a información aquí, e se queredes apoiar a estes seis grupos, vatade en Twitter cada día ao Hashtag #AnimaciónCoruña42Locais .


Share:

25 de abr. de 2014

Animación III Coruña42


Este domingo terá lugar a III Maratón Atlantica Coruña42. E como en todas as edicións anteriores, como parte da animación que se disporá polo percorrido da carreira, tocarán grupos usuarios dos Locais de Ensaio. Temos habilitados dous escenarios, o primeiro na Casa Sol, e o segundo a carón do Teatro Colón.
Presentamosvos aos 6 grupos que poderedes escoitar:



Hooked: Grupo Rock Alternativo con influencias de Pearl Jam, Queens of the Stone Age, Foo Fighters, Radiohead, ...
Actuarán ás 09.00 h en Casa Sol e ás 11.00 h no Colón


Blueside: Grupo de versións Blues e Rock ´n Roll, vivaz e con ganas de contaxiar seu bo roio
Actuarán ás 09.40 h en Casa Sol e ás 11.40 h no Colón



Say My Name: Banda de Pop-Rock que vos sorprenderá
Actuarán ás 10.20 h en Casa Sol e ás 12.20 h no Colón



Man City Blue: Banda de Rock Alternativo formada por voz, baixo, dúas guitarras e batería
Actuarán ás 09.40 h no Colón e ás 11.00 h en Casa Sol



Reckless: Grupo de Trash/Groove Metal, influenciado por Megadeth, Lamb of God ou Pantera
 Actuarán ás 10.20 h no Colón e ás 11.40 h en Casa Sol



Beards & Beers: Banda Galega de Rock... de Rock do malo!!  :p
 Actuarán ás 09.00 h no Colón e ás 12.20 h en Casa Sol


Poderedes apoiar a todos estes grupos, tanto asistindo aos seus concertos coma votando, desde o domingo ás 08.00 h, en twitter ao Hashtag #AnimaciónCoruña42Locais , xa que hai premio para as animacións máis seguidas.
Share:

13 de mar. de 2014

Obradoiro de saúde auditiva



Logo dun tempo, voltamos á carga coas accións formativas presentadas desde os Locais de Ensaio. Desta vez, e dada a boa acollida que tivo o ano pasado o Obradoiro de Saúde Musical, tentarase indagar un pouco máis en como un músico debe facer para desfrutar da música, e chegar aos 60 sen padecer problemas auditivos.

Falarase sobre prevención de perda auditiva (facendo incluso simulacións do que pode pasar se se excede o límite de Decibelios mentres escoitamos música ou tocamos, e se dana o sistema auditivo), uso de protectores e as ventaxas da monitorización in-ear, entre outras cousas.

A ponencia levarana a cabo María Luaces, técnica en Gaes, ademais dunha gran coñecida no panorama musical da cidade. O obradoiro terá lugar o 29 de marzo ás 11.00 h na Sala O Túnel do Coliséum. Para poder asistir, unicamente compre seguir os pasos que atoparedes aquí, rematando o prazo de inscrición o venres 28 ás 21.00 h.
Share:

7 de mar. de 2014

Periodo de inscrición para comezar a quenda semestral de abril a setembro



Pasaron máis de 5 meses desde que se repartiron horarios por última vez, chegou o momento de voltar a presentar novamente as inscricións para desfrutar das 3 horas de ensaio semanais durante os vindeiros 6 meses e seguir crecendo (se fúchedes un dos grupos usuarios durante estes últimos meses), ou de comezar unha experiencia musical (para os novos grupos), na que poder ensaiar, compoñer, gravar, aprender, e mesmo tocar en directo!!.

Para iso, deberedes presentar:

- Solicitude debidamente cuberta (importante non deixar campos valeiros, para poder contactar con vós!!)
- Fotocopia dos DNI´s de todos/as os/as compoñentes do grupo
- Certificado de empadroamento no Concello da Coruña con data de 2014, ou ben matrícula escolar nun centro da cidade para o curso 2013-2014 de, cando menos, a metade dos integrantes do grupo
- Permiso paterno/materno/do titor ou titora legal de todas as persoas menores de idade, acompañado da fotocopia do DNI do maior de idade que asina o permiso

A data límite para presentar as solicitudes é o sábado 22 de marzo (todas as incricións recibidas con posterioridade irán directamente para a listaxe de agarda, facilitándolles os horarios valeiros, en caso de habelos, por orde de inscrición). 
Os arquivos de solicitude e permiso de menores poderedes atopalos neste blogue
Os únicos grupos exentos de presentar solicitude son os que, presentando a solicitude durante a última quenda semestral, non tiveron opción de poder ensaiar e constan na listaxe de agarda (debido á ocupación do 100% do servizo durante estes meses).

Coma sempre, o lugar de recepción das solicitudes será o Centro Municipal de Información Xuvenil do Fórum Metropolitano (r/ Río Monelos, 1). 
Horario: Luns a venres de 10.00 a 14.00 e de 17.00 a 20.00 h, e sábados de 11.00 a 14.00 h.

A nova quenda dará comezo o 2 de abril. Previamente, todos os grupos inscritos que resulten Aptos recibirán un e-mail convocándoos á xuntanza de asignación de horarios, segundo explica o noso regulamento interno.


Share:

1 de feb. de 2014

V Festival Solidario En Directo (crónica)


Espectacular noite a vivida onte no Ágora, e as cifras así o corroboran: máis de 400 asistentes ao evento, e 1320 Kg de comida recollidos para a Cociña Económica. Agradecer (e moito) a todas as persoas que se achegaron a esta nova cita que xuntaba a solidariedade coa música colaborando coa causa, e por suposto a todos os músicos que onte pasaron polo escenario para mostrar a súa música.

Breathing Loud eran os primeiros en tocar, e a súa enerxía non tardou en contaxiar ao público. Especial mención ten a conversión de algún dos temas do seu repertorio a formato acústico, co traballo que conleva.

O debut enriba dos escenarios de Hooked deixou un bo sabor de boca.

B.A.R. é o novo nome da formación anteriormente coñecida por After All. Non podían faltar á súa cita, xa que son o único grupo que leva participado en todas as edicións do Festival Solidario En Directo.

Outro dos grupos debutantes que deixaron un bo sabor de boca... e o momentazo "Loquillo". 
Beards & Beers

Tremebundos fixeron desfrutar coas suas letras, estreando nova formación.

A presentación de Say my Name foi todo un éxito. Grupo a ter en conta, ollo!!

Moonk demostraron, ao igual que no seu anterior concerto, contar cun público fiel.

O debut de SeisPorOito fíxose agardar, pero as cousas boas é o que teñen...
Espectacular ovación final, logo da súa actuación.

Concurso:

Como comentabamos na anterior entrada a este blogue, nesta edición puxemos en marcha un concurso no que o grupo máis votado polo público terá a opción de gravar un EP no estudio de gravación dos Locais de Ensaio. Logo de rematar co escrutinio, Say my Name son os gañadores. Noraboa!!
E tamén noraboa á gañadora das dúas entradas de Vetusta Morla sorteadas, quen se atopaba presente no momento de sacar a papeleta premiada no recibidor do auditorio do Ágora, minutos despois de rematar o festival.
A anécdota deste concurso veu con algunhas votacións, (obviamente invalidadas) lembrando a antigos grupos usuarios dos Locais de Ensaio, como Dharmak, Akupuntura, Brewed ou Carretera Comarcal.


Share:

Incrición obradoiros ou masterclasses

número de visitas

Participación e Innovación Democrática

Centro Municipal de Información Xuvenil do Concello da Coruña (CMIX)

Blog Archive