• Novos obradoiros

    Remataremos a presente quenda semestral retomando as actividades formativas dos Locais de Ensaio con dous novos obradoiros.

  • Aberto novo prazo de inscrición

    Ábrese un novo prazo de inscrición para optar a unha das 48 prazas de ensaios dispoñibeis para os vindeiros 6 meses.

  • Festival Solidario Coruña En Directo XI

    Podes recoller as invitacións no Centro Municipal de Información Xuvenil do Fórum Metropolitano, nos propios Locais, ou no acceso ao auditorio do Centro Ágora o día dos concertos, a partires da apertura de portas (18.30 h).

  • Volume 6

    Volume 6 é unha intensa mirada ao traballo realizado no noso estudio de gravación durante o 2016, logo de meses previos de ensaios.

9 de dec. de 2015

Masterclass de guitarra eléctrica con Alberto Cereijo


Nos Locais de Ensaio imos rematar o 2015 por todo o alto. Teremos o gusto de recibir a unha das grandes figuras do rock do país, Alberto Cereijo. Inmerso actualmente na xira de despedida de Los Suaves, "La música termina", poderedes desfrutar do seu talento durante as, aproximadamente, 4 horas de explicacións sobre o seu xeito de entender o instrumento e a música.

O evento terá lugar o martes 22 de decembro, a partires das 16.00 h. Para asistir, unicamente deberedes inscribirvos na aplicación "inscrición nos obradoiros" que atoparedes á vosa dereita. O prazo de inscrición rematará o venres 18 ás 20.00 h, momento a partir do que confirmaremos asistencia. As prazas son limitadas ao aforo do Salón de Actos do Centro Cívico Municipal dos Mallos, tendo preferencia os usuarios e as usuarias actuais dos Locais, e seguidamente os/as menores de 30 anos. Porén, de non cubrirse todas as prazas, podería asistir calquer cidadán.
Share:

22 de out. de 2015

Listaxe definitiva de admitidos para a quenda semestral outubro-marzo

A continuación se publica a listaxe definitiva na solicitude de prazas para a quenda semestral que comezará o vindeiro luns, 26 de outubro.

Os grupos admitidos foron convocados, nos enderezos de e-mail facilitados nas súas solicitudes, á xuntanza de adxudicación de horarios que terá lugar na tarde do venres, 23 de outubro, ás 19.00 h na Sala de Prensa do Coliséum (acceso pola porta 12).
Share:

15 de out. de 2015

Obradoiro de Expresión Corporal (crónica)


 Hoxe tivemos unha divertida e instructiva tarde no Espazo de Iniciativas Xuvenís. Daniel Currás explicou aos/ás asistentes como, co adecuado vestiario e variando certas posturas do noso corpo, conseguimos unha interpretación máis veraz. O fin deste obradoiro era mellorar a expresión corporal mentres se está enriba do escenario, e para conseguilo, todos os/as asistentes tiñan que traer aprendido un breve monólogo sacado de Blade Runner. As interpretacións de cada un/unha foron gravadas en cámara, e proxectadas para ver como cambia nos ollos do público ver un/unha artista segura de sí mesmo/a, e cunha mensaxe definida, a cando se deixa todo á improvisación.

As risadas, e máis o bo ambiente, predominaron durante toda a acción formativa. Estamos seguros que alguén hoxe vai soñar coa porta de Tannhäuser e máis con Raios C.
Share:

7 de out. de 2015

Listaxe provisional de admitidos para a quenda semestral outubro 2015-abril 2016

A continuación se publican as listaxes provisionais na solicitude de prazas para a quenda semestral de ensaios que comezará o 26 de outubro.


Unha vez publicada a listaxe provisional, abrese un prazo de 10 días naturais, desde a publicación, para que os interesados podan presentar as alegacións que estimen convintes. Finalizado este prazo, publicarase a listaxe definitiva. Os grupos que consten con solicitudes incompletas poderán achegar a documentación requerida nos rexistros municipais en horario de 08.00 a 14.00 h (agás no de Novo Mesoiro, que abre ás 09.00 h), ou o sábado 10, de 09.00 a 13.00 h, nos rexistros de María Pita e do Fórum Metropolitano. Esta documentación tamén se poderá entregar de xeito telemático a través da sede electrónica. O prazo rematará, en ambos casos, o venres 16 ás 14.00 h CET.

De existir algún grupo que, tendo presentada a súa solicitude en prazo, non aparezan aptos nesta listaxe, poderán porse en contacto cos Locais de Ensaio do Concello da Coruña no e-mail: locaisdensaio@gmail.com

Todos os grupos que finalmente resulten aptos estarán convocados á xuntanza de adxudicación de horarios. Nela, como é costume, iranse repartindo todos os horarios dispoñibeis segundo a orde estipulada no noso regulamento interno, precisando un representante de cada grupo (no caso de non respostar no momento en que lle toque, ese grupo irá por orde para a listaxe de agarda).
Share:

6 de out. de 2015

Obradoiro de expresión corporal no escenario

Cantas veces marchaches dun concerto coa sensación de que o grupo tocaba moi ben, pero non acabaches de meterte no seu roio?. Notas que co teu grupo pode pasar o mesmo?. Este obradoiro vai dirixido a integrantes de grupos musicais que queran mellorar a súa presenza no escenario e a súa linguaxe corporal.

Daniel Currás recalcará a importancia de incorporar o corpo á actuación, controlar o espazo onde actúas, e en base a iso, falarase de:

- Interpretación
- Imaxe e mensaxe
- O grupo e a individualidade
- Improvisación
- A importancia do xesto

O evento terá lugar o xoves 15 de outubro, ás 19.00 h, no Espazo de Iniciativas Xuvenís (rúa Matadoiro, 68. Preto da Domus). Para inscribirte só tes que cubrir o formulario que tes á túa dereita, un e-mail informarache da túa situación, xa que teñen preferencia os usuarios e máis as usuarias actuais dos Locais de Ensaio, e despois os menores de 30. O prazo de inscrición rematará o martes 13 ás 21.00 h.
Share:

28 de set. de 2015

Crónica Festival Solidario Coruña En Directo VIII

Nova edición do noso Festival Solidario, pero non foi un calquera. As novidades nos Locais fan que, desta vez, tiveramos 4 cámaras para gravar un tema de cada grupo participante, dando un salto de calidade que, en cuestión dunhas poucas semanas, poderedes desfrutar na nosa canle de Youtube. Foi un día especial para os 3 grupos que debutaban enriba dun escenario (Harakiri, Psychoducks, e The Lemonade Society), pero tamén para algúns dos outros grupos, ao dar un salto de calidade evidente, e porque incorporamos a figura do mestre de cerimonias para facer máis atractivos os cambios de grupo... pero sobretodo porque cremos que as máis de duascentas persoas que se achegaron á Sala O Túnel marcharon contentas, e por conseguir encher a furgoneta da Cociña Económica que veu recoller hoxe as doazóns que, entre todos e todas, fixemos o venres.


The Lemonade Society






Share:

24 de set. de 2015

Volume 5


Sae á luz a nova escolma de cancións gravadas nos Locais de Ensaio entre setembro de 2014 e agosto de 2015, en total 14 temas para desfrutar da canteira musical da cidade. Descubriredes a grupos como Ciudad Flotante, The Sonic Headlight, e formacións que xa levaban tempo ensaiando por aquí até que se decidiron a entrar no noso estudio, como After All, ou Us in the Mirror. Ese sería o caso tamén de Say My Name e Jules & The Wolf, cuxas cancións se poden atopar tamén nos seus propios traballos, Say My Name e Shores. Unha vez máis, Almakoa e Avézar non perderon a súa oportunidade de gravar nova composición (ambas formacións apareceron polo de agora en todas as edicións), como tampouco vellos coñecidos tanto de edicións anteriores como dos Festivais Solidarios Coruña En Directo: Beards & Beers, Breathing Loud, Ingravity, Senectud Sideral, Tanit, e The Ice Road.

Poderedes retirar, de balde, este CD no CMIX do Fórum Metropolitano, nas Bibliotecas Municipais, e nos propios Locais. As primeiras copias repartiranse na Sala O Túnel do Coliséum, xusto ao rematar o VIII Festival Solidario Coruña En Directo.


Share:

18 de set. de 2015

VIII Festival Solidario Coruña En Directo


O día 25 chega unha nova edición do Festival Solidario Coruña En Directo. A Sala O Túnel voltarase a encher de música para apoiar a gran labor que a Cociña Económica fai nesta cidade. De ahí que cada invitación deberá ir acompañada, no momento do acceso á sala, cun mínimo de 3 Kg/litros de alimentos non perecedeiros. Entre os produtos máis demandados pola entidade, destacan o aceite de xirasol, e máis o café molido.

Será unha noite moi especial, sobre todo para as 3 formacións que debutan neste festival: Harakiri, Psychoducks e The Lemonade Society. O resto de grupos, vellos coñecidos deste festival quenes mostrarán a súa evolución: After All, Avézar, Breathing Loud, Hateout, e Us in the Mirror. O evento ten a novidade de contar con mestre de cerimonias, Daniel Currás, quen amenizará os cambios de escenario entre actuacións.

Os convites poderán retirarse no Centro Municipal de Información Xuvenil, ademais dos propios Locais de Ensaio. No caso de non esgotarse, poderanse retirar tamén no acceso á sala, mentres non se supere o seu aforo.

Podedes seguir toda a información do evento en Facebook e Twitter, co HT #EnDirectoVIII.
Share:

16 de set. de 2015

Abrese o periodo de inscrición para a nova quenda semestral


Unha vez máis, e xa van 11, renovaremos a nosa axenda de ensaios para daren opción de uso das nosas instalacións a 48 grupos locais. De vos interesar, deberedes presentar o formulario de inscrición, xunto á documentación requerida, ben nos rexistros municipais (Palacio de María Pita, Fórum Metropolitano, Centro Ágora, Cidade Deportiva de Riazor ou Centro Cívico de Novo Mesoiro*) de luns a venres** en horario de 08.00 a 14.00 h, ou ben de xeito telemático mediante a sede electrónica do Concello. As inscricións deben adxuntar:

- Solicitude debidamente cuberta
- Fotocopia do DNI de todos os integrantes do grupo
- Volante de empadroamento no Concello da Coruña, con data de 2015, ou ben matrícula escolar nun centro da cidade para o curso 2015/2016 de, cando menos, o 50% dos integrantes do grupo.

No caso de que algún integrante sexa menor de idade, ademais, deberá facilitar:

- Autorización do pai-nai-titor/a
- Fotocopia do DNI da persoa que asine o permiso paterno/materno, ou do titor ou da titora

Como se pode atopar nas bases da convocatoria, os únicos requisitos para acceder aos ensaios son:

- Que, alo menos, a metade do grupo sexa menor de 30
- Que, alo menos, a metade do grupo certifique vivir actualmente na Coruña, ou ben cursar estudos no presente curso nun centro educativo da cidade

O periodo de inscrición rematará o venres 2 de outubro ás 14.00 h CET. As solicitudes recibidas logo dese intre tramitaranse unha vez comezada a nova quenda de ensaios, formando eses grupos a listaxe de agarda por orde de recepción das solicitudes.

Os novos horarios darán comezo o luns 26 de outubro. O 7 de outubro publicarase a listaxe provisional de admitidos, dando pé a un prazo de reclamacións e de presentación da documentación requerida que rematará o venres 16 de outubro ás 14.00 h CET. O mércores 21 de outubro presentarase a listaxe definitiva de admitidos, e convocarase a un representante de cada un deses grupos para a xuntanza de adxudicación de horarios.

* O horario do Centro Cívico de Mesoiro é de 09.00 a 14.00 h,
** Os rexistros de María Pita e máis do Fórum Metropolitano permiten entregar a documentación, ademais, os sábados de 09.00 a 13.00 h.


Share:

25 de xuño de 2015

Nova quenda para o obradoiro con Carmen Rey


Debido á alta demanda desta obradoiro, habilitase unha nova quenda para os luns 29 de xuño, e 6 e 13 de xullo. A temática será exactamente a mesma, e o horario tamén, de 11.00 a 14.00 h.

O prazo de inscrición rematará, igualmente, o venres, día 26, ás 21.00 h. Para inscribirte, só tes que cubrir o formulario que atopas á túa dereita, e un e-mail respostarache da túa situación, xa que teñen preferencia @s actuais usuari@s dos Locais de Ensaio, e despois os menores de 30 anos.
Share:

18 de xuño de 2015

Obradoiro de técnica vocal moderna, con Carmen Rey


Abrese o prazo de inscrición para o obradoiro de técnica vocal moderna. Profundizarase na importancia dos estiramentes, da respiración, dos exercicios de afinación e vocalización, ... ademais da improvisación. O obxectivo é que os asistentes melloren a súa técnica vocal, evitar lesións, e coñecerse o rango vocal. Cada alumn@ preparará ao longo do curso 2 cancións, e facilitaranse uns exercicios prácticos para facer na casa ou no ensaio.

Esta acción formativa consta de 9 horas, e terá lugar na Sala 2 dos Locais de Ensaio, en horario de 11.00 a 14.00 h, os martes 30 de xuño, e o 7 e máis o 21 de xullo.

Como fai xa 4 anos, contamos con Carmen Rey para impartila. Para os que non a coñezades, é mestra de canto, e compoñente de varios proxectos musicais, entre os que destacamos Carmen Rey Grupo, onde se xunta con musicazos da talla de Miguel Cabana, Tito Calviño, Rubén Apratto e Sergio Delgado, ou Sisters in the House, coro de música negra ao cal dirixe, integrado exclusivamente por mulleres, e que actualmente compite no programa Oh Happy Day da TVG.

Para inscribirte só tes que cubrir o formulario que tes á túa dereita, un e-mail de resposta informarache da túa situación, xa que teñen preferencia @s usuari@s dos Locais de Ensaio, e despois os menores de 30. O prazo de inscrición rematará o venres 26 de xuño ás 21.00 h, e para que @s asistentes consigan sacarlle o mellor rendemento, o obradoiro está limitado a 8 prazas.
Share:

27 de abr. de 2015

Horarios abril-outubro 2015

Con data 24 de abril de 2015, tras o proceso de valoración de solicitudes recibidas para a quenda de abril a outubro 2015, e tras a aprobación da listaxe definitiva, procedese á adxudicación de horarios aos grupos, seguindo os criterios establecidos nas bases.

Aqueles grupos que non están na listaxe publicada, cumpran os requisitos dispostos no regulamento e queran comezar a ensaiar nos Locais de Ensaio da Concellaría de Xuventude, poderán presentar a solicitude de uso, xunto a toda a documentación requerida, nos Rexistros Municipais, ou a través da Sede Electrónica https://sede.coruna.gob.es/, e optar a uns dos horarios de ensaio que todavía quedan dispoñibeis.
Share:

24 de abr. de 2015

Lista definitiva de admitidos para a quenda abril-outubro 2015

A continuación se publica a listaxe definitiva na solicitude de prazas para a quenda semestral que comezará o vindeiro luns, 27 de abril.

Os grupos admitidos foron convocados, mediante os enderezos de e-mail facilitados nas súas solicitudes, á xuntanza de adxudicación de horarios que terá lugar na tarde do venres 24 de abril ás 19.00 h na Sala O Túnel do Coliséum (acceso pola porta 12).
Share:

13 de abr. de 2015

Listaxe provisional de admitidos para a quenda abril-outubro 2015

A continuación se publican as listaxes provisionais na solicitude de prazas para a quenda semestral que comezará o 27 de abril.


Unha vez publicada a listaxe provisional, abrese un prazo de 5 días hábiles, desde a publicación, para que os interesados podan presentar as alegacións que estimen convintes. Finalizado este prazo, publicarase a listaxe definitiva. Os grupos que consten con solicitudes incompretas, poderán achegar a documentación requerida nos rexistros municipais en horario de 08.00 a 14.00 h de luns a venres (agás o de Mesoiro, que abre ás 09.00 h), ou o sábado 18, de 09.00 a 13.00 h, nos rexistros de María Pita e Fórum Metropolitano. Esta documentación tamén se poderá entregar telematicamente a través da sede electrónica. O prazo rematará, en ambos os casos, o sábado 18 ás 13.00 h.

Os grupos que, tendo presentada a súa solicitude en prazo, e non aparezan aptos nesta listaxe, poderán porse en contacto cos Locais de Ensaio da Concellaría de Educación, Deportes e Xuventude no e-mail: locaisdensaio@gmail.com

Todos os grupos que finalmente resulten aptos estarán convocados á xuntanza de adxudicación de horarios . Nela, como é costume, iranse repartindo todos os horarios dispoñibeis segundo a orde estipulada no noso regulamento interno, precisando un representante de cada grupo (no caso de non respostar no momento en que lle toque, ese grupo irá por orde para a listaxe de agarda).
Share:

10 de abr. de 2015

Animación IV Coruña42


O vindeiro día 19 tocará madrugar para desfrutar do ambiente que se crea co Maratón Atlántica Coruña42. Desde os Locais de Ensaio, e como en anteriores edicións, apoiamos o evento con 6 grupos usuarios que quixeron formar parte da festa, e mostrar (tanto a corredores como á cidadanía) do que son capaces. Habilitaranse 2 escenarios para estes grupos: Casa Sol, con vistas á praia do Orzán, e en Ramón y Cajal (a uns 20 metros da entrada do Centro Comercial de Catro Camiños).

Presentamosvos aos grupos:

The Sonic Headlight: Banda de Rock Alternativo con temas propios en inglés, e influenciados por bandas desde Muse ou Radiohead até Artic Monkeys ou Black Keys.

The Sonic Headlight tocarán ás 08.30 h. no escenario de Catro Camiños

Say My Name: Grupo de Pop inglés, que formaron parte na final do Noroeste Pop-Rock 2014, e foron seleccionados para o circuito Coruña Sonora. Actualmente, se atopan finalizando o seu segundo EP.

Say My Name tocarán ás 09.30 h. no escenario de Catro Camiños

Us in the Mirror: Cada membro é unha liña do pentagrama sobre o que escriben a súa música, para buscar un estilo único e coa forte intención de transmitir todo no que cren.

Us in the Mirror tocarán ás 09.10 h. no escenario de Casa Sol

Avézar: Grupo de Rock/Metal formado entre amigos nos Locais de Ensaio do barrio de Monte Alto

Avézar tocarán ás 10.10 h. no escenario de Casa Sol

Almakoa: Grupo creado a partires de amigos desde a infancia. As súas raíces xurden a partires das quedadas na praia onde a inspiración viña soa tras sesións de surf.

Almakoa tocarán ás 11.10 h. no escenario de Casa Sol

Beards & Beers: Grupos de Rock & Roll do malo (según eles!!) buscando facerse un oco no panorama.

Beards & Beers tocarán ás 12.10 h. no escenario de Casa Sol

Poderedes apoiar a todos estes grupos, tanto asistindo aos seus concertos, como por twitter co hashtag #AnimaciónCoruna42locaisdensaio (un chío por día) desde o domingo 19 ás 08.00 h até o domingo 26 ás 23.59 h. O premio da animación está en xogo :)
Share:

1 de abr. de 2015

Novo periodo de inscrición para a quenda semestral abril-outubro 2015


Abrese o periodo de inscrición para optar a ensaiar nos Locais de Ensaio da Concellaría de Xuventude durante o vindeiro semestre. O xeito de se inscribir modificase, poidendo entregar toda a documentación requerida, ben nos rexistros xerais (Palacio Municipal de María Pita, Fórum Metropolitano, Centro Ágora, Cidade Deportiva de Riazor e o Centro Cívico de Mesoiro*) en horario de 08.00 a 14.00 h., ben telematicamente desde a sede electrónica do Concello. As inscricións deberán constar de:

- Solicitude de inscrición debidamente cuberta.
- Voante de empadroamento, ou resgardo de matrícula do centro educativo, de, cando menos, a metade dos/as compoñentes do grupo.
- Fotocopia do DNI de cada membro do grupo.

No caso de que as persoas solicitantes sexan menores de idade:
- Fotocopia do DNI da persoa que firme o permiso paterno/materno, ou do titor ou da titora.

Lembramosvos os requisitos para acceder aos ensaios:

- Cando menos, a metade do grupo ten que ser menor de 30 anos.
- Cando menos, a metade do grupo debe certificar vivir na Coruña, ou cursar estudos nun centro educativo do Concello.

O prazo de presentación de solicitudes rematará o 10 de abril.

Os únicos grupos exentos de presentar a solicitude son os grupos que actualmente conforman a listaxe de agarda, ao presentala para ensaiar na quenda que agora remata, e non atopar opcións de ensaio validas para o grupo durante este tempo.

Os novos horarios darán comezo o 27 de abril. O día 13 de abril emitirase unha listaxe provisional de admitidos, convocando a eses grupos (mediante os enderezos de e-mail facilitados na solicitude) á xuntanza de adxudicación dos novos horarios.

Bases da convocatoria de solicitude de uso dos Locais de Ensaio.

* O horario do rexistro municipal de Mesoiro é de 09.00 a 14.00 h.
Share:

2 de feb. de 2015

Festival Solidario En Directo VII (Crónica)

Foi unha tarde chuviosa de inverno, pero a xente que se achegou ao Centro Ágora o venres esqueceuno namáis sentaren nas butacas do auditorio. É que os 6 grupos actuaron como unha estufa xigante, e deron motivos para apraudir e desfrutar durante as 4 horas de música que tivemos.

Breathing Loud abriron o festival mostrando a súa bipolaridade nun repertorio que mesturou momentos sensibeis con outros máis enérxicos.

The Sonic Headlight durante o seu debut. 
Se che gusta o Rock Alternativo con tintes brit, xa tes grupo na cidade para seguir.

Tanit están nunha época moi doce. 
Contundentes en directo, e prolíficos nas súas composicións, van atopando seu oco pouco a pouco.

A de Say My Name é a victoria de facer as cousas ben: a fogo lento, e con talento e seriedade.

Us In The Mirror tiraron de repertorio clásico, pero para nada manido.

E remataron Beards & Beers... na historia dos Locais non houbo un grupo que fixera tan amenos os paróns entre canción e canción, contaxian seu bo roio!!.

Desde a organización, quixeramos voltar a agradecer o apoio da xente que se achegou, e que fixo que os voluntarios do Banco de Alimentos Rías Altas apañaran máis de 700 latas de conservas para repartir entre os máis necesitados. Tamén, gabar o labor dos grupos participantes, e as facilidades que deron para que todo saíra á perfección, ao igual que os operarios do Centro Ágora.

Respecto aos concursos que tiñamos en liza, as entradas de AC/DC xa teñen dono (chamase Gonzalo), e o grupo que máis votos recibíu, e que lle da opción de gravar un EP no estudio dos Locais é, novamente, Say My Name.
Share:

26 de xan. de 2015

Condicións de participación no sorteo dunha entrada dobre para AC/DC


Para todos aqueles que estades interesados ou interesadas no concurso AC/DC que levaremos a cabo o venres, durante o Festival Solidario En Directo VII, facilitamosvos as condicións de participación pulsando nesta ligazón.

Facendo un breve resumo, o grupo participante no festival que máis votos reciba do público, será premiado con varias sesións de gravacións para a realización dun EP con temas propios.

Por outra banda, sortearase unha entrada dobre para o concerto de AC/DC en Madrid, o domingo 31 de maio (día no que os Locais de Ensaio cumpriremos 5 anos), entre as persoas asistentes ao #EnDirectoVII que depositen a súa papeleta de votación (debidamente cuberta, e confirmando a audición de, polo menos, tres dos grupos participantes) na furna disposta para tal fin no recibidor do auditorio do Centro Ágora, e que cumpran:

- Cubrir todos os campos da papeleta de votación, e redondear o nome dos 3 grupos cos que máis desfrutou da súa actuación.
- Depositar unha única papeleta de votación por asistente.

As papeletas de votación serán facilitadas ao público no momento do acceso ao auditorio, desde a apertura de portas até o transcurso da cuarta actuación (21.30 h. aproximadamente). Pola súa banda, a furna de votación estará aberta desde minutos antes da finalización da terceira actuación, e até 10 minutos despois da fin do festival. Finalmente, sorteo farase inmediatamente despois, no propio recibidor, e diante dos asistentes que queiran asistir ao proceso de extración da papeleta gañadora.

Moita sorte a tod@s!!
Share:

21 de xan. de 2015

VII Festival Solidario En Directo



A nova edición do Festival Solidario En Directo contará con 6 das bandas usuarias dos Locais de Ensaio máis activas nestes intres. O evento terá lugar no auditorio do Centro Ágora, o venres 30, e a primeira actuación comezará ás 19.30 h. (abriranse os accesos media hora antes).

- Breathing Loud son un grupo moi mozo co que pasaredes un bo rato.
- The Sonic Headlight debutarán neste festival coa súa proposta de Rock Alternativo.
- Tanit deixaron moi bo sabor de boca tanto no anterior festival, como no ciclo Coruña Sonora, coa súa visión alternativa da música.
- Say My Name estrearonse fai exactamente un ano, e desde aquela este grupo Pop non fixo máis que crecer.
- Us In The Mirror mostrarán a súa fluctuación entre o Rock Progresivo e o Jazz Fusión.
- Beards & Beers serán os encargados de pechar o festival cunha boa dose de Rock.

Ao festival accedese mediante invitación. As poderedes recoller (facilitaranse un máximo de 3 por persoa):

- No Centro Municipal de Información Xuvenil do Fórum Metropolitano, de luns a venres de 10.00 a 14.00 e de 17.00 a 20.00 h, e sábados de 11.00 a 14.00 h.
- Nos Locais de Ensaio (baixos do Coliséum) de luns a venres de 16.00 a 22.00 h, e sábados e domingos de 11.00 a 14.00 h.

(no caso de quedar invitacións, disporíamos delas no acceso ao auditorio do Centro Ágora, pola porta de abaixo, na tarde do festival)

E como sempre queremos ter un fin solidario, desta vez pedimos a doazóns dun mínimo de 3 latas de conservas a favor do Banco de Alimentos Rías Altas como apoio ao seu labor.

Ao igual que no V Festival En Directo, o público elixirá as súas actuacións favoritas, e o grupo con máis votos gravará un EP ao longo de 2015 no estudio de gravación dos Locais de Ensaio. Cada papeleta de votación debidamente cuberta optará ao sorteo presencial que se realizará xusto ao rematar o festival, e que terá como premio unha entrada dobre para o concerto que AC/DC darán en Madrid o 31 de maio (xusto ese día fará 5 anos dos primeiros ensaios nos Locais de Ensaio). A todas aquelas persoas interesadas no premio do sorteo (lembramosvos que as entradas esgotaronse en menos de 2 horas), recomendamoslles a lectura da entrada, neste mesmo blogue, que especificamente fala das condicións de participación do sorteo.

Poderás seguir todas as novidades deste evento nas contas de facebook e twitter dos Locais de Ensaio, e co hashtag #EnDirectoVII.


Imaxe sacada da rolda de prensa de presentación do festival
Share:

Incrición obradoiros ou masterclasses

número de visitas

Participación e Innovación Democrática

Centro Municipal de Información Xuvenil do Concello da Coruña (CMIX)

Blog Archive